biazai

Ka mit ah maw zumh um lo ka chim ah?



A awm lio par bang duh a nung i

A par lio par bang aa dawh pumrua le hmai

Na mirh mui kha Kawlrawn thli lum kihter khotu an si.

Ka chambau hngalhter khotu mirhmui zong an si.





Ka tial biazai ah lungkuainak chumdi aa zelh tawn hi

Kan zohnak ka mit i zaang-uainak aa tel tawn hi

A nimi ka hmur i a der thinlung, ka thinlung hi

A hmuh awk na hngal tawn hna hnga maw?

Aruang na hngal tawn hna hnga maw?



Zeiruang thalcaan nih lung a lenter?

Zeiruang khuasik nih lung a khuai?

Zeiruang furpi zaan ruah thawng le puan lum nih lung an thlim khawh tawn lo,

aruang na hngal hnga maw?



Palep le khuai nih an tlanh rose par khi zeiruang a lungpuam khun hnga?



Tlangsaampar hmanh tlantu a ngeih a thei rua lo maw?

Minu, tlangsampar hmanh tlantu a ngei dakaw.

Tlantu pakhathnih ruang na lungpuam cun na palh men lai.

Na theih ding cu,

Tlangsampar hmanh tlantu a par lio cun a ngei dakaw.



Israelmi nih Jerusalem Temple an ven bang kan ven peng hi

Ka lung ba tuk cang lo maw, a lung ba tuk na ti ve lo maw?



A sullam thuhmi biazai tlang bang hngalh a har na mitmu cawlcangh nih

Lungtur a molhter sual lai, Minute aw, ka phang.



Everest tlangpar he maw ka tahchunh rih lai Pasifik rili ne he dah,

Ka dawtnak cu?

Khi he tahchunh an tlak lo na hngal rua lo maw, ka dawtnak?