Chikhat a hrang thlitu sin a ttian tawn chumdi ruang maw ka dawtnak na zumh lo
tlawmpal a lum ruang a ral tawn tikhal ruangah dah?
Chikhat thlitu sin chumdi an ttian na hmuh zawn khin
tlawmte a lum ruang a ral tikhal na hmuh zawn khin
A sumlei a luang zungzal tiva-ti kong khi teh na ruat bal maw?
Ruah a sur zong, ni a linh zong a sumlei luang zungzalmi tiva ti,
A ko hnik zong, kuang tlum lo in a lianh zong a sumlei luang zungzalmi tiva ti he
Ka dawtnak a luan zungzal ding hi, Minu, na zum kho rua lo maw?
Lung aa tuai ruang maw, vawlei buai ruang maw, ka hngal lo
Minu na ka lughrinh ruang lungkuai in nang zuun ka uaipi tawn hi..
Ka mit au maw zumh um hrim lo, ka umtu dah
Ka hmur hi maw na zumh khawh lo, ka lungthin hme?
Kei lungthin cu zaan khi a si.
Khuasik zaan asiloah tthal zaan,
Van a fim i thlapa arfi hmunkhat an laamtti zaan khi.
Van i a tleu diLdel arfi rual khi zoh hmanh hna
Na zoh deuh an tam deuh na hngalh lai.
Na zoh chinchin an tam chin khi na fiang ko lai.
Cubangcun, ka zoh hmanh,
Ka thinlung silohmanh ah ka mit tal
Kan dawtnak hi, Minu, na fiang ko lai.
No comments:
Post a Comment